|
Kadir Bektaşoğlu: «Müəllimlər şagirdlərin savadlı olması üçün
inanılmaz fədakarlıq edirlər»
 Son
illər Azərbaycanın təhsil sistemində bir sıra yeniliklər tətbiq
olunsa da, hələ ki, bu sahədə istədiyimiz naliyyəti əldə edə
bilməmişik. Heç kəsə sirr deyil ki, bu gün orta məktəbi bitirən
məzunun repetitor hazırlığı görmədən, orta məktəbdə ona verilən
biliklə ali məktəbə daxil olması müşkül məsələdir. Tələbə Qəbulu
üzrə Dövlət Komissiyasının (TQDK) məlumatları da təsdiqləyir ki,
yüksək nəticə göstərərək ali məktəblərə qəbul olanların çoxu
lisey və xüsusi təhsil müəssisələrinin məzunlarıdır. Budəfəki
qəbul imtahanları da istisna olmadı. Nəticə göstərdi ki, bu il
ali məktəbə qəbul olanların mütləq əksəriyyəti liseylərin
yetirmələridir. İmtahanlarda maksimal nəticə göstərərək 700 bal
toplayan 7 rekordçudan ikisi, Nəriman İsmixan oğlu Məmmədli və
Aydan Aydın qızı Həsənova da orta təhsili liseydə alıblar.
Türkiyə Dəyanət Vəqfinin Bakı Türk Liseyində. Bu il bu liseyi
bitirən 64 məzunun hər biri ali məktəbə daxil olub. İki məzunu
ən yüksək nəticə göstərərək 700 bal toplayan bu təhsil
müəssisəsinin uğur reseptini bizə elə liseyin müdiri Kadir
Bektaşoğlu açdı.
- Kadir müəllim, rəhbərlik etdiyiniz liseyin məzunları bu
günlərdə daha bir uğura imza ataraq ali məktəblərə qəbul
imtahanlarında ən yüksək nəticə göstərdilər.
Sizcə bu uğurun səbəbini nədə axtarmaq lazımdır? Liseydə
istedadlı uşaqların təhsil almasında, yoxsa onlara verilən
təhsilin keyfiyyətində?
- Əlbəttə danmaq olmaz ki, biz şagirdləri məktəbimizə seçərək
götürürük.
Hər il bizim məktəbimizdə oxumaq üçün 1200-ə yaxın şagird
imtahan verir. Biz onlardan ancaq 100-104 nəfərini götürə
bilirik. Hansı ki, onlar imtahan verən uşaqların içərisində ən
zəkalılarıdır. Amma eyni zamanda, məktəbimizdə dərs keçən
müəllimlər də savadları ilə seçilən müəllimlərdir. Mən deyərdim
ki, hər ikisinin rolu var. Amma əsas səbəb fədakarlıqdır. Bizə
bu uğuru qazandıran müəllimlərin və şagirdlərin fədakarlığıdır.
- Liseydə tətbiq edilən təhsil sistemi digər orta məktəblərdə və
liseylərdə verilən təhsil sistemindən nə ilə fərqlənir?
- Bizdə də dərslər Azərbaycan Respublikası Təhsil Nazirliyinin
hər il təsdiq etdiyi proqram əsasında keçirilir.
Yəni digər orta məktəb və liseylərdə olduğu kimi, bütün
dərsliklər Azərbaycan Respublikasının orta məktəblərində
keçirilən dərsliklərdir. Tədris dili də Azərbaycan dilidir.
Yalnız şagirdlərə əlavə olaraq türk dili, ilahiyyat və
mənəviyyat dərsləri keçirilir. Bu da onların vətəninə, xalqına
layiqli şəxsiyət kimi formalaşmasına xidmət edir. Bizim liseyin
digər orta təhsil müəssisələrindən ən böyük fərqi burada fədakar
müəllimlərin çalışmasıdır. Hansı ki, həmin müəllimlər keçdikləri
dərsləri şagirdlərin mənimsəməsi üçün inanılmaz fədakarlıq
göstərirlər.
- Liseyiniz dünyəvi təhsil sistemini tətbiq edir.
Bu sistemin özəlliyi və üstünlüyü nədədir?
- Öncə qeyd edim ki, dünyəvi təhsil sistemi dedikdə şagirdi
istedadı olan və seçdiyi istiqamətə hazırlamaq başa düşülür.
Dünyəvi təhsil sisteminə görə, şagirdin hansı sahəyə marağı və
biliyi varsa, o istiqamət də əsas götürülür. Humanitar yaxud
dəqiq fənlər üzrə şagirdə baza hazırlanır. Bu da öz nəticəsini
verir. Şagird hansı fənlər üzrə xüsusi hazırlaşdırılırsa,
seçdiyi qrupa uyğun yüksək nəticə göstərir.
- Mərkəzləşdirilmiş imtahan qaydalarına görə, şagird attestat
almaq üçün bütün fənlərdən sualları cavablandırmalıdır.
Əgər seçəcəyi qrupdakı fənlərə uyğun hazırlaşırsa, orta məktəbdə
digər fənlərdən imtahan suallarını necə cavablandırır?
- Doğrudur. Amma sizi inandırım ki, Təhsil Nazirliyinin
məlumatına görə, mərkəzləşdirilmiş imtahanlarda da bizim
liseyimizin şagirdləri yüksək nəticə göstərirlər. Çünki onlar
yüzlərlə uşağın içərisindən seçilənlərdir.
- Lisey məzunlarının savadlı yetişməsində müəllimlərin inanılmaz
fədakarlıq göstərdiyini söylədiniz.
Burada çalışan müəllim hansı tələblərə cavab verməlidir?
Ümumiyyətlə, müəllimlərin işə qəbulu hansı qaydada aparılır?
- Biz liseyimizə savadlı müəllimləri işə götürürük.
Bu əsas şərtdir. İşə qəbulla bağlı müsabiqə elan olunduqda
istənilən müəllim öz cV-sini təqdim edə bilər. İmtahan zamanı
verilən sualları cavablandıran şəxs liseydə işə girmək üçün real
namizəddir. Amma biz həmçinin, pedoqoji təcrübəni və hazırlığı
da əsas götürürük. Liseydə çalışan müəllim savadlı olmaqla
yanaşı, şagirdlərlə ünsiyyət qurmağı da bacarmalıdır. Dərsini
sevdirə bilməyən müəllim, hətta ən savadlı olsa, belə bizim
liseyimizdə çalışa bilmir.
- Müəllimlərdən söz düşmüşkən, deyirlər lisey məzunlarının qəbul
imtahanlarında yüksək nəticəyə imza atmasının bir səbəbi də
burada çalışan müəllimlərin test suallarının hazırlanmasında
iştirak etməsi ilə bağlıdır.
- Qəti şəkildə deyə bilərəm ki, yox.
Burada çalışan 104 müəllimdən test suallarının hazırlanmasında
cəmi dörd müəllim iştirak edir. Test bankındakı sualların
müəyyənləşməsində, bunkerdə isə bizdə çalışan müəllimlərdən heç
biri iştirak etmir. Amma bu cür söz-söhbətlərin dolaşmasını da
normal sayıram. Çünki doğrudan da, bir liseydən məzunların hər
birinin ali məktəbə daxil olması inanılmazdır. Bu il 64 məzunun
hər biri ali məktəbə daxil olub. İmtahana girən məzunlarımızdan
29 nəfəri 600-dən yuxarı bal toplayıb. Bu 48 faiz deməkdir. Çox
böyük rəqəmdir. Amma bizim fəlsəfəmizdə sevinmək ən uzağı 24
saat çəkir. Növbəti il üçün hazırlaşırıq. Ona görə də, hər il
belə uğurlara nail oluruq.
- Lisey məzunlarının belə uğuru bu təhsil müəssisəsinə marağı da
artırıb...
- Əlbəttə, Bakı Türk Liseyinə maraq günü-gündən artır.
Valideynlər çalışırlar ki, hər bir çətinliyə rəğmən övladları
bizim liseydə təhsil alsınlar. Sizi inandırım ki, Sumqayıtdan,
Hövsandan uşağını bizim liseyə oxumağa gətirənlər var. Əgər
valideyn hər gün səhər saat 08:30-da uzaq məsafədən uşağını
təhsil almaq üçün bu liseyə gətirirsə, deməli buradakı təhsilin
keyfiyyətinə, əməyinin boşa getməyəcəyinə inamı var. Amma bayaq
qeyd etdiyim kimi, liseyə şagirdlərin qəbulu imtahanla aparılır.
Biz ən zəkalılarını seçirik. 5-ci sinifdən 11-ci sinifə qədər
təmənnasız, yəni pulsuz verdiyimiz təhsilin qarşılığında
onlardan tək umduğumuz yaxşı oxumalarıdır. Çünki Bakı Türk
Liseyində təhsil pulsuzdur və liseyin bütün maddi xərclərini
(müəllim və işçi maaşları, təmir işləri, vergi, yeməkxana,
təhsil haqları, cari xərclər) Türkiyə Diyanət Vəqfi təmin edir.
1994-cü ildən fəaliyyət göstərən liseydə bu gün 718 şagirdə 102
müəllim dərs keçir. Liseyin saxlanılması üçün Vəqf illik 1
milyon dollara yaxın vəsait ayırır. Buna görə xeyirxah insanlara
təşəkkür edirəm.
- Kadir müəllim, digər məktəblərin də belə uğur qazanmaları üçün
onlara nə tövsiyə edərdiniz?
- Digər məktəblərə tövsiyə edirəm ki, şəxsiyyətlərin yetişməsi
üçün dayanmadan çalışsınlar.
Məktəbdə hamı «hər şey Azərbaycan üçün» şüarı altında
çalışmalıdır. Tək hədəfləri Azərbaycan üçün şəxsiyyət, nümunə
insan yetişdirmək, vaxtlarını bu işə sərf etmək olmalıdır. Bu
yolda fədakarlıq göstərsələr, belə uğurlara imza ata bilərlər.
Müəllif: Zülfiyyə QULİYEVA |
