Bakı, 6 fevral (AzərTAc). Tələbə Qəbulu üzrə Dövlət Komissiyası (TQDK) qəbul imtahanlarına fərdi qaydada hazırlaşan abituriyentlərə metodiki kömək məqsədi ilə 2010-cu ildən yeni layihə həyata keçirməyə başlamışdır. Təcrübəli ekspertlərin qəbul imtahanı fənləri üzrə videomühazirələri hazırlanır və Komissiyanın internet saytında yerləşdirilir. 

TQDK-dan AzərTAc-a bildirmişlər ki, hazırda bu layihə üzərində təkmilləşdirmə işləri həyata keçirilir. Yeni videomühazirələrin hazırlanmasında iştirak etmək istəyən müəllimlər TQDK-ya müraciət etməklə, bu layihənin iştirakçısı ola bilərlər. Həmin şəxslərdən orta ümumtəhsil müəssisələrində müvafiq fənn üzrə qüvvədə olan tədris proqramlarını və dərslikləri dərindən bilən, bu sahədə müəyyən göstəriciləri olan, yüksək pedaqoji məharəti, səlis nitq qabiliyyəti, müasir təlim bacarıqlarına malik müəllimlər seçilərək qəbul proqramlarına uyğun mövzular üzrə videomühazirələrin hazırlanmasına cəlb olunacaqlar. Bu prosesdə iştirak etmək istəyən müəllimlər özləri haqqında məlumatları press@tqdk.gov.azelektron poçtuna göndərə bilərlər. 

Yanvarın 30-da Təhsil Nazirliyində Avropa İttifaqının TAIEX proqramı çərçivəsində “Azərbaycanın ali təhsil sisteminin tənzimlənməsi üzrə mövcud qanunvericiliyin qiymətləndirilməsi” mövzusunda seminarın açılışı olmuşdur. 

Tədbir Təhsil Nazirliyi, Bakı Dövlət Universiteti və Avropa İttifaqı tərəfindən təşkil edilmişdir. 
AzərTAc xəbər verir ki, ali məktəb, beynəlxalq qurumların nümayəndələrinin, mütəxəssislərin iştirak etdikləri açılış mərasimində təhsil naziri Misir Mərdanov Azərbaycanın Avropa təhsil məkanına - Bolonya prosesinə qoşulduğunu xatırlatmış və seminar barədə danışmışdır. 
Məlumat verilmişdir ki, tədbirə qatılan Avropa İttifaqının ekspert missiyasının məqsədi Azərbaycanın ali təhsil sisteminin Bolonya sistemi standartlarına uyğunlaşdırılması baxımından normativ-hüquqi sənədlərin monitorinqinin aparılması və qiymətləndirilməsindən ibarət olacaqdır. 
Eyni zamanda, Təhsil Nazirliyi, Bakı Dövlət Universiteti, Azərbaycan Dillər Universiteti və digər müvafiq təhsil müəssisələrindən nümayəndələrin iştirak edəcəkləri seminarda beynəlxalq və Avropa təhsil sisteminin prinsiplərinə uyğunlaşma, zəruri tədris və təlim sənədlərinin təhlili vasitəsilə milli təhsil standartları əsasında təhsil müəssisələrinin akkreditasiyası qaydaları və digər məsələlər müzakirə olunacaqdır. Müasir dünyada təhsilin mühüm rolunu vurğulayan Təhsil hüququ və siyasəti üzrə Avropa Assosiasiyasının prezidenti, Antverpen Universitetinin nümayəndəsi Jan De Groof Azərbaycanın Bolonya prosesinə qoşulmasının əhəmiyyətindən danışmışdır.

İsveç Milli Agentliyinin Ali təhsil üzrə nümayəndəsi Lennart Stahle, Finlandiyanın Ali təhsilin qiymətləndirilməsi şurasının baş eksperti Karl Holm ali təhsil sahəsində təcrübə mübadiləsinin genişləndirilməsinin vacibliyini bildirmişlər.  Mövzu üzrə müzakirələr aparılmışdır.

Seminar fevralın 3-də başa çatacaqdır.

Fizika fənni üzrə elmi-metodiki seminar keçirilmişdir.Tələbə Qəbulu üzrə Dövlət Komissiyasından (TQDK) AzərTAc-a bildirmişlər ki, seminarda 201I-ci ildə ali təhsil müəssisələrinə IV ixtisas qrupu üzrə qəbul imtahanında istifadə edilmiş test tapşırıqları (A variantı, 43-50 saylı) elmi-metodiki cəhətdən təhlil olunmuşdur.
Bakı və Sumqayıt şəhərlərindən orta və ali təhsil müəssisələrinin müəllimləri, metodistlər, Azərbaycan Milli Elmlər Akademiyasının əməkdaşları ilə bərabər, TQDK-nın Naxçıvan, Gəncə, Lənkəran, Şəki, Quba regional bölmələrindən müvafiq fənn müəllimləri də onlayn rejimində internet vasitəsilə fikirlərini söyləmişlər. 
Test tapşırıqlarının dərsliklərə və müvafiq qəbul proqramına uyğunluğu, abituriyentlərin bilik və bacarıqlarını obyektiv qiymətləndirməyə imkan verdiyi təsdiqlənmişdir. 

Qəbul imtahanında abituriyentlərin zəif cavablandırdıqları və cavab verməkdən imtina etdikləri test tapşırıqlarının izahlı şərhinə dair tövsiyə hazırlanması qərara alınmışdır.

2011-2012-ci tədris ili üçün ali təhsil müəssisələrinə I, II, III və IV ixtisas qruplarına rus bölməsi üzrə 3 min 913 gənc qəbul olunmuşdur (əlavə yerləşdirmə nəzərə alınmaqla).
Qəbul planı 98,24 faiz yerinə yetirilmişdir. Tələbə Qəbulu üzrə Dövlət Komissiyasından AzərTAc-a bildirmişlər ki, müvafiq bölmə üzrə qəbul planı ümumilikdə3 min 983 yer olmuşdur. 

Təhsil Nazirliyi XX əsrin ən böyük faciələrindən biri olan Xocalı soyqırımının 20-ci ildönümü münasibətilə ümumtəhsil və ilk peşə-ixtisas təhsili müəssisələrinin şagirdləri arasında “Uşaqlar və müharibə” mövzusunda respublika rəsm müsabiqəsi keçirəcəkdir.Nazirlikdən AzərTAc-a bildirmişlər ki, fevralda təşkil olunacaq tədbirin məqsədi miqyasına görə dünya və Azərbaycan tarixinə ən dəhşətli və faciəli səhifələrdən biri kimi daxil olmuş Xocalı soyqırımı haqqında gənc nəslə geniş məlumat vermək, torpaqlarımızın müdafiəsi uğrunda döyüşlərdə şəhid olmuş insanların xatirəsini ehtiramla yad etmək, məktəblilərdə Vətənə sədaqət və məhəbbət hissini gücləndirməkdir. 
Müsabiqə rayon (şəhər) və respublika mərhələləri üzrə keçiriləcəkdir. Qaliblər nazirlik tərəfindən diplom və qiymətli hədiyyələrlə mükafatlandırılacaqlar.

Xarici dil (ingilis, fransız və alman dilləri) fənləri üzrə elmi-metodiki seminar keçirilmişdir. 
Tələbə Qəbulu üzrə Dövlət Komissiyasından (TQDK) AzərTAc-a bildirmişlər ki, seminarda ötən il ali təhsil müəssisələrinə qəbul imtahanlarında I və IV ixtisas qrupları üzrə abituriyentlərin zəif cavablandırdığı və cavab verməkdən imtina etdikləri test tapşırıqlarına dair hazırlanmış metodiki tövsiyə müzakirə olunmuşdur. Bakı və Sumqayıt şəhərlərindən orta və ali təhsil müəssisələrinin müəllimləri, metodistlər, Azərbaycan Milli Elmlər Akademiyasının əməkdaşları ilə bərabər, TQDK-nın Naxçıvan, Gəncə, Lənkəran, Şəki, Quba regional bölmələrindən müvafiq fənn müəllimləri də onlayn rejimində internet vasitəsilə metodiki tövsiyə ilə bağlı fikirlərini açıqlamışlar. Metodiki tövsiyə “Abituriyent” jurnalında dərc olunacaqdır. 

Kimya fənni üzrə elmi- metodiki seminar keçirilmişdir.Tələbə Qəbulu üzrə Dövlət Komissiyasından (TQDK) AzərTAc-a bildirmişlər ki, seminarda bu il ali məktəblərə IV ixtisas qrupu üzrə qəbul imtahanında istifadə edilmiş test tapşırıqları (B variantı, 66-75 saylı) statistik göstəricilər əsasında elmi-metodiki cəhətdən müzakirə olunmuşdur.
Bakı və Sumqayıt şəhərlərindən orta və ali məktəb müəllimləri, metodistlər, Azərbaycan Milli Elmlər Akademiyasının əməkdaşları ilə bərabər, TQDK-nın Naxçıvan, Gəncə, Lənkəran, Şəki, Quba regional bölmələrində müvafiq fənn müəllimləri də onlayn rejimində internet vasitəsilə test tapşırıqları barədə fikirlərini bildirmişlər. 
Test tapşırıqlarının dərsliklərə və müvafiq qəbul proqramına uyğun olduğu, abituriyentlərin bilik və bacarıqlarını obyektiv qiymətləndirməyə imkan verdiyi təsdiqlənmişdir. Eyni zamanda, abituriyentlərin cavab verməkdə çətinlik çəkdikləri test tapşırıqlarına dair metodiki tövsiyə hazırlanması və onun “Abituriyent” jurnalında dərc edilməsi qərara alınmışdır.

Təhsil Nazirliyi cari tədris ilinin ikinci yarısında ümumtəhsil məktəblərinin şagirdləri arasında “Ən çox sevdiyim idman növü” mövzusunda respublika rəsm müsabiqəsi keçirəcəkdir. Nazirlikdən AzərTAc-a bildirmişlər ki, məqsəd iyun ayında Londonda keçiriləcək XXX Yay Olimpiya Oyunlarına maraq oyatmaq, olimpiya idman növlərini məktəblilər arasında təbliğ etməkdir. Müsabiqə rayon (şəhər) və respublika mərhələləri üzrə təşkil olunacaqdır.

2011-2012-ci tədris ili üçün ali təhsil müəssisələrinə birinci ixtisas qrupuna Azərbaycan bölməsi üzrə 8 min 141 gənc qəbul olunmuşdur (əlavə yerləşdirmə nəzərə alınmaqla). Qəbul planı 94,75 faiz yerinə yetirilmişdir. Tələbə Qəbulu üzrə Dövlət Komissiyasından AzərTAc-a bildirmişlər ki, müvafiq bölmə üzrə qəbul planı 8 min 592 yer olmuşdur. 

Tələbə Qəbulu üzrə Dövlət Komissiyasında (TQDK) kimya fənni üzrə elmi-metodiki seminar keçirilmişdir.TQDK-dan AzərTAc-a bildirmişlər ki, seminarda 2011-ci ildə ali məktəblərə IV ixtisas qrupu üzrə qəbul imtahanında istifadə edilmiş test tapşırıqları (B variantı, 51-65 saylı test tapşırıqları) statistik göstəricilər əsasında elmi-metodiki baxımdan müzakirə olunmuşdur. Test tapşırıqlarının hər biri mürəkkəblik dərəcəsinə, relevantlıq kateqoriyasına görə və məzmun baxımından təhlil edilmişdir. Tapşırıqların qəbul proqramına və dərsliklərə uyğunluğu, abituriyentlərin bilik və bacarıqlarını obyektiv qiymətləndirməyə imkan verdiyi bir daha təsdiqlənmişdir.

Qəbul imtahanında A və B variantlarında istifadə edilmiş test tapşırıqları analoji olduğundan, hər iki variant üzrə abituriyentlərin cavablarının statistik göstəriciləri də bir-birinə uyğun olmuşdur. Hər iki variantdakı test tapşırıqları çətinlik dərəcəsi, relevantlıq kateqoriyaları baxımından da bir-birinə tam uyğundur. İclasda Bakı və Sumqayıt şəhərlərindən orta və ali məktəb müəllimləri, metodistlər və AMEA-nın mütəxəssisləri ilə bərabər, TQDK-nın Naxçıvan, Gəncə, Lənkəran, Şəki və Quba regional bölmələrində fəaliyyət göstərən elmi-metodiki seminarlarda iştirak edən müvafiq fənn müəllimləri də onlayn rejimdə internet vasitəsilə test tapşırıqları haqqında fikirlərini bildirmiş, təkliflərini vermişlər. 
Növbəti seminarda müzakirə davam etdiriləcəkdir.