Kadir Bektaşoğlu: «Müəllimlər şagirdlərin savadlı olması üçün inanılmaz fədakarlıq edirlər»

Son illər Azərbaycanın təhsil sistemində bir sıra yeniliklər tətbiq olunsa da, hələ ki, bu sahədə istədiyimiz naliyyəti əldə edə bilməmişik. Heç kəsə sirr deyil ki, bu gün orta məktəbi bitirən məzunun repetitor hazırlığı görmədən, orta məktəbdə ona verilən biliklə ali məktəbə daxil olması müşkül məsələdir. Tələbə Qəbulu üzrə Dövlət Komissiyasının (TQDK) məlumatları da təsdiqləyir ki, yüksək nəticə göstərərək ali məktəblərə qəbul olanların çoxu lisey və xüsusi təhsil müəssisələrinin məzunlarıdır.

Aydan Həsənova IV ixtisas qrupu üzrə ölkə birincisi olub.

Tələbə Qəbulu üzrə Dövlət Komissiyası (TQDK) IV ixtisas qrupu üzrə keçirilmiş imtahanın nəticələrini açıqlayıb. Türkiyə Diyanət Vəqfi Bakı Türk Liseyinin məzunu Aydan Həsənova 700 bal toplayaraq, bu ixtisas qrupu yüksək nəticə göstərib.

Liseyin müdiri Kadir Bektaşoğlunun Lent.az-a verdiyi məlumata görə, IV ixtisas qrupu üzrə imtahan vermiş 13 lisey məzunundan 9 nəfəri (69 faiz) 600-dən çox bal toplayıb. Bu nəticələr ölkə üzrə yeni rekord müəyyən edib.

I, III, IV ixtisas qrupları üzrə imtahan vermiş 37 lisey məzunundan 18 nəfər (49 faiz) 600-dən çox bal toplayıb, bütün məzunlar ali məktəbə qəbul olmaq üçün zəruri nəticəni əldə ediblər. Kadir Bektaşoğlu deyib ki, iyulun 23-də II ixtisas qrupu üzrə imtahan olacaq. Bu imtahanda liseyin 23 məzunu iştirak edəcək. Onların 15 nəfərinin 600-dən çox bal toplayacağı gözlənilir. Qeyd edək ki, bu il liseyin iki məzunu, I və IV ixtisas qrupu üzrə imtahan vermiş Nəriman Məmmədli və Aydan Həsənova 700 bal toplayaraq, Azərbaycan tarixində yeni rekord nəticəyə imza atıblar.

Artıq dördüncü ildir ki, ali məktəblərə qəbul imtahanlarında ən yüksək- 700 bal zirvəsi fəth olunur. Bu il isə estafeti İsmayıl Kazımov, Nəriman Məmmədli, Esmira Baxşəliyeva, İlkin Məsimov, Aygül Tanrıverdiyeva, Günel Abdullayeva və Aydan Həsənova davam etdirmişlər. Tələbə adını qazanmış bu yeddi gənc 700 ballıq nəticə ilə imtahan verdikləri qrupların və bütövlükdə builki abituriyentlərin liderlərinə çevrilmişlər.

Aydan Həsənova: “Ən böyük arzum ev almaqdır”

Ali məktəblərə yenicə başa çatan qəbul imtahanlarında 7 abituriyent test kitabçasındakı 125 sualın hamısına düzgün cavab verməklə 700 bal toplayıb. Ali məktəblərə 4-cü ixtisas qrupu üzrə isə 3 abituriyent 700 bal yığıb. İmtahanda yüksək nəticə göstərən Aydan Həsənova da tələbə adını qazanmağın sevincini yaşayır. İmtahanda uğur əldə etmək hər bir abituriyentin arzusudur. Ancaq bu nailiyyət heç də asan qazanılmır.

Ali məktəblərə qəbul imtahanlarında ilk dəfə 700 bal (6 nəfər) 2008-ci ildə toplanılıb. Ötən ilki imtahanlarda isə 2 nəfər 700 bal toplaya bilmişdi. Bu il isə rekordçuların sayı 7 nəfərdir.

Onlar yeddi nəfərdir və hazırda tələbə adını qazanmaq üçün hər kəsin həsəd aparacağı ən yüksək göstəricini əldə ediblər. Bəziləri hələ imtahandan əvvəl bu uğuru əldə edəcəyinə tam əmin olub, bəziləri isə hər cür hazırlığa rəğmən yenə bir balaca həyəcan hissi keçirib. İlkin Məsimov, Aydan Həsənova, Esmira Baxşəliyeva, Nəriman Məmmədli, Aygül Tanrıverdiyeva (hamısı Bakı), Günel Abdullayeva (Şəki), İsmayıl Kazımov (Mingəçevir) bu gün ölkəmizin ən populyar, örnək göstərilən gəncləridir. Biz də 110 minə yaxın abituriyentin iştirak etdiyi bilik yarışında ən yüksəl bal  toplayan bu gənclərlə həmsöhbət olduq.

Aydan Həsənova: “Ən böyük arzum cərrah olub xalqıma layiqli xidmət göstərməkdir”

Məlum olduğu kimi, ali məktəblərə IV ixtisas qrupu üzrə qəbul imtahanında üç abituriyent yüksək nətiçə göstərib. Onlardan biri Türkiyə Diyanət Vəqfi Bakı Türk Liseyinin məzunu Aydan Həsənovadır. O iyulun 17-də IV ixtisas qrupu üzrə ali məktəblərə keçirilən qəbul imtahanında 700 bal toplayaraq ölkə birincisi olub. Sual kitabçasındakı 125 sualın hamısını düzgün cavablandıran Aydanı redaksiyamıza dəvət edib uğuru ilə bağlı söhbətləşdik.

AMEA İnformasiya Texnologiyaları İnstitutunun www.ict.az portalının administratoru Sevinc Həsənovanın qız övladı, Türkiyə Dəyanət Vəqfi Bakı Türk Liseyinin məzunu Aydan Həsənova iyulun 17-də IV ixtisas qrupu üzrə ali məktəblərə keçirilən qəbul imtahanında 700 bal toplayıb.

Sual kitabçasındakı 125 sualın hamısını düzgün cavablandıran Aydan bu cür yüksək göstəriciyə nail olmaqda müəllimlərinin əməyini qeyd edib. “İmtahanda yüksək bilik nümayiş etdirərək uğur qazanacağıma əmin idim. Sevinirəm ki, həm valideynimin, həm də müəllimlərimin etimadını doğrultdum”.

Azərbaycan Dövlət Tibb Universitetinin “Müalicə işi” fakültəsində ali təhsil almaq istəyən Aydanın ən böyük arzusu cərrah olmaq və xalqına layiqli xidmət göstərməkdir. AMEA İnformasiya Texnologiyaları İnstitutunun kollektivi Aydanı təbrik edir, ona peşəkar həkim kimi yetişməsini, gələcəkdə tibb sahəsində böyük uğurlara imza atmasını arzulayır.

Tələbə Qəbulu üzrə Dövlət Komissiyasından (TQDK) AzərTAc-a bildirmişlər ki, Azərbaycan Respublikası ali təhsil müəssisələrinin boş qalan plan yerlərinə və tam orta təhsil bazasında (11 illik) orta ixtisas təhsili müəssisələrinə müsabiqənin nəticələri avqustun 11-də saat 17:15-dən etibarən TQDK-nın internet saytında yerləşdirilmişdir. Müsabiqə nəticəsində ali təhsil müəssisələrinin boş qalan plan yerlərinə 998 nəfər, tam orta təhsil bazasında orta ixtisas təhsili müəssisələrinə 6758 nəfər qəbul olunmuşdur.

Ali təhsil müəssisələrinin boş qalan (vakant) yerlərinə qəbul olunan abituriyentlər avqustun 13-dən 20-dək, tam orta təhsil bazasında orta ixtisas təhsili müəssisələrinə qəbul olunanlar isə avqustun 16-dan 31-dək sənədlərini daxil olduqları təhsil müəssisəsinə təqdim etməklə qeydiyyatdan keçməlidirlər. Həmin müddətdə qeydiyyatdan keçməmək abituriyentin müvafiq ixtisasa yerləşdirilməsindən imtina etməsi kimi qiymətləndiriləcək və onun qəbul haqqında əmri tədris müəssisəsinə göndərilməyəcəkdir.

Tələbə Qəbulu üzrə Dövlət Komissiyasından AzərTAc-a bildirmişlər ki, ali təhsil müəssisələrinin boş qalan (vakant) yerləri üzrə ixtisas seçimi davam edir.

İxtisas seçimi avqustun 10-dək internet vasitəsilə aparılır. İxtisas seçmək hüququ olan abituriyentlər elektron ixtisas seçimi ərizə formasında ali məktəblərin boş qalan yerləri olan ixtisasları ilə yanaşı orta ixtisas təhsili müəssisələrinin ixtisaslarının da kodlarını göstərə bilərlər.

Tələbə Qəbulu üzrə Dövlət Komissiyasından (TQDK) AzərTAc-a bildirmişlər ki, TQDK 2010/2011-ci tədris ili üçün Azərbaycan Respublikasının ali təhsil müəssisələrinə qəbulun nəticələrini avqustun 4-də saat 21:00-da Komissiyanın internet saytında yerləşdirmişdir.

Abituriyentlər yerləşdirmənin nəticələri barədə məlumatı mobil telefonla “İmtahancell” xidməti vasitəsilə iş nömrələrini 7727 nömrəsinə göndərməklə də öyrənə bilərlər.

Ali təhsil müəssisələrinə qəbul olunmuş abituriyentlərin siyahısı avqustun 6-da “Abituriyent” jurnalının 6-cı nömrəsində dərc olunacaqdır. Ali təhsil müəssisələrinin boş qalan (vakant) yerlərinin siyahısı “Abituriyent” jurnalının 7-ci nömrəsində dərc olunacaqdır.

Azərbacanın müxtəlif universitetlərindən və Naxçıvan Dövlət Universitetindən olan müəllimlər Türkiyənin Bolu şəhərindəki İzzət Baysal Universitetində “Təhsildəki yeniliklər və mədəniyyət sahəsində mübadilə” mövzusunda keçirilən seminarda iştirak edirlər.

Azərbaycan, Qırğızıstan, Gürcüstan, Özbəkistan, Makedoniya, Monqolustan, Rusiya Federasiyasının Tatarıstan və Çuvaşiya muxtar respublikalarından 79 ali təhsil mütəxəssisi və türkoloqun iştirak etdiyi seminarın təşkilatçısı Türkiyənin Təhsil Nazirliyi, Türk Əməkdaşlıq və İnkişaf Agentliyidir (TİKA). Seminarın açılıçında çıxış edən Türk Dili Kurumunun sədri Haluk Akalın, Türkiyə Təhsil Nazirliyinin idarə rəisləri Əhməd Fikri Bayraqlı və Həsən Kaplan təhsil və türk dilinin zənginləşməsi sahəsində türkdilli ölkələrin universitetlərinin əməkdaşlığının əhəmiyyətindən bəhs etmişlər. Qeyd olunmuşdur ki, türk dili dünyanın ən qədim beş dilindən biridir. Türk dilinin ilk lüğəti olan Mahmud Kaşğarinin "Divani-lüğət-it-türk" yazıldığı dövrdə dünyada bu gün danışılan dillərin bir çoxu hələ meydana gəlməmişdi. Seminar avqustun 2-dək davam edəcəkdir.

Tələbə Qəbulu üzrə Dövlət Komissiyası (TQDK) 2010/2011-ci tədris ili üçün Azərbaycan Respublikası ali məktəblərinə və tam orta təhsil bazasında (11 illik) orta ixtisas təhsili müəssisələrinə IV ixtisas qrupu üzrə iyulun 17-də qəbul imtahanı keçirmişdir.

Eyni zamanda, Hərbi liseylərə, Azərbaycan Tibb Universitetinin Orta Hərbi Tibb Məktəbinə (feldşer ixtisası üzrə) qəbul imtahanı aparılmışdır. Qəbul imtahanı Bakıda və Naxçıvanda keçirilmişdir. Bu il IV qrup üzrə 15 min 348 abituriyent ərizə təqdim etmişdir.

Bu ixtisas qrupu üzrə təhsil almaq istəyən 86 abituriyent xarici ölkələrin vətəndaşıdır.
İmtahan saat 11:00-da başlanmış və 3 saat davam etmişdir. Bu gün saat 19:30-da “Space” telekanalının canlı efirində TQDK-nın məsul əməkdaşları və ekspertləri tərəfindən imtahanda istifadə olunmuş sualların düzgün cavabları barədə məlumat veriləcəkdir. İmtahanda istifadə olunmuş sualların düzgün cavabları, eyni zamanda, TQDK-nın internet saytında yerləşdiriləcəkdir. Abituriyentlər imtahanın nəticələri barədə məlumatı TQDK-nın internet saytından, həmçinin mobil telefonla “İmtahancell” xidməti vasitəsilə öyrənə biləcəklər. Bütün qruplar üzrə ixtisas seçimi iyulun 25-dən avqustun 2-dək internet vasitəsilə aparılacaqdır.

İyulun 16-da Tələbə Qəbulu üzrə Dövlət Komissiyasında (TQDK) keçirilən mətbuat konfransında TQDK-nın sədri Məleykə Abbaszadə 2010/2011-ci tədris ili üçün ölkəmizin ali məktəblərinə və tam orta təhsil bazasında (11 illik) orta ixtisas təhsili müəssisələrinə III və I ixtisas qrupları üzrə keçirilmiş qəbul imtahanlarının nəticələri ilə bağlı fikirlərini bildirmişdir.
TQDK-nın iyulun 17-də IV qrup üzrə qəbul imtahanı keçirəcəyini xatırladan M.Abbaszadə bu il həmin qrup üzrə 15 min 348 abituriyentin ərizə təqdim etdiyini diqqətə çatdırmışdır. Konfransda jurnalistlərin sualları cavablandırılmışdır.

AzərTAc xəbər verir ki, iyulun 11-də Tələbə Qəbulu üzrə Dövlət Komissiyası (TQDK) 2010/2011-ci tədris ili üçün Azərbaycan Respublikası ali məktəblərinə və tam orta təhsil bazasında (11 illik) orta ixtisas təhsili müəssisələrinə I ixtisas qrupu üzrə qəbul imtahanı keçirmişdir.

Bakı, Naxçıvan, Gəncə və Sumqayıt şəhərlərində keçirilən imtahana, ümumilikdə 2 min 413 müəllim nəzarət etmişdir. Bu il I qrup üzrə 35 min 769 abituriyent ərizə təqdim etmişdir. Sənəd verənlərin 32 min 992-si Azərbaycan bölməsinin, 2 min 777-si isə rus bölməsinin məzunudur. Bu ixtisas qrupu üzrə təhsil almaq istəyən 156 abituriyent xarici ölkələrin vətəndaşıdır.

Tələbə Qəbulu üzrə Dövlət Komissiyasından (TQDK) AzərTAc-a bildirmişlər ki, 2010/2011-ci tədris ili üçün Azərbaycan Respublikası ali təhsil müəssisələrinə III ixtisas qrupu üzrə iyulun 4-də keçirilmiş qəbul imtahanının nəticələri iyulun 6-da saat 19:20-dən etibarən TQDK-nın internet saytında yerləşdirilmişdir. İmtahanın nəticələri barədə məlumatı, həmçinin mobil telefonla “İmtahancell” xidməti vasitəsilə öyrənmək olar. Bunun üçün abituriyentlərin iş nömrələrini 7727 nömrəsinə göndərmələri kifayətdir. Hər bir abituriyent öz imtahan nəticələrinə dair məlumat vərəqini internet vasitəsilə əldə edə bilər. III ixtisas qrupu üzrə imtahanda iştirak etmək üçün 33316 abituriyent sənəd vermişdir. Onlardan 31764 nəfəri imtahan vermiş, 1552 abituriyent isə imtahanda iştirak etməmişdir.

Test imtahanının nəticələrinə əsasən, 8435 abituriyent (xüsusi qabiliyyət tələb edən ixtisaslar üzrə müsabiqə iştirakçıları istisna olmaqla) müsabiqədə iştirak etmək hüququ qazanmışdır. III ixtisas qrupu üzrə test imtahanının nəticələri əsasında imtahan ballarının paylanması “Abituriyent” jurnalının xüsusi buraxılışında dərc olunmuşdur. İxtisas seçimi iyulun 25-dən avqustun 2-dək internet vasitəsilə aparılacaqdır. Qəbul aparılan ixtisasların siyahısı isə “Abituriyent” jurnalının 3-cü nömrəsində dərc edilmişdir.

III ixtisas qrupu üzrə ixtisas seçimində ümumi balı 250-dən, hər bir imtahan fənni üzrə ayrılıqda topladığı nisbi balı 10-dan az olmayan abituriyentlər iştirak edə bilərlər. Ümumi balı 300 və daha çox olan abituriyentlərin ixtisas seçiminə buraxılmaları üçün onların fənlər üzrə cavablarına nisbi bal məhdudiyyəti tətbiq olunmur. III ixtisas qrupu üzrə dövlət sifarişi əsasında ayrılmış yerlərin ixtisas seçimində ümumi balı 350-dən az olmayan abituriyentlər iştirak edə bilərlər. Müsabiqədə iştirak etmək üçün qoyulan tələbləri ödəyən abituriyentlər iyulun 25-dən avqustun 2-dək "Abituriyentin elektron ərizəsi"ndə ixtisasları seçib təsdiq etməlidirlər.